गावाची सर्वसाधारण माहिती (परिच्छेद स्वरूपात)

विंचूरगवळी (सुलतानपूर) हे गाव नाशिक तालुका व नाशिक जिल्ह्यात स्थित आहे. गावाची एकूण लोकसंख्या २३४७ असून त्यामध्ये १०५८ स्त्रिया व १२८९ पुरुषांचा समावेश आहे. गावाचे एकूण क्षेत्रफळ ६२४.०९ हेक्टर असून त्यापैकी गावठाण क्षेत्र ४ हेक्टर आहे. बागायती क्षेत्र १३७.३०६ हेक्टर, पडीत जमीन ३० हेक्टर तर वनजमीन २० हेक्टर आहे. ग्रामपंचायतीच्या मालकीची गायरान व मैदान जमीन उपलब्ध आहे.

गावात ग्रुप ग्रामपंचायत विंचूरगवळी कार्यालय कार्यरत असून आरोग्य सेवेसाठी प्राथमिक आरोग्यवर्धिनी उपकेंद्र उपलब्ध आहे. शिक्षण सुविधांमध्ये २ अंगणवाड्या, जिल्हा परिषद प्राथमिक शाळा (इ. १ ली ते ८ वी) व नवजीवन पब्लिक स्कूल (इ. १ ली ते १० वी) यांचा समावेश आहे. नवजीवन पब्लिक स्कूलमध्ये २० वर्गखोल्या असून सुमारे २२५ विद्यार्थी शिक्षण घेत आहेत, तर जिल्हा परिषद प्राथमिक शाळेत ८ वर्गखोल्या व ५१ विद्यार्थी आहेत.

गावात पिण्याच्या पाण्यासाठी राष्ट्रीय पेयजल योजना, जलजीवन मिशन योजना तसेच विहिरींचा वापर केला जातो. आरओ वॉटर फिल्टरद्वारे शुद्ध पिण्याच्या पाण्याचा पुरवठा केला जातो. सांडपाणी निचऱ्यासाठी गटारी व शोषखड्डे उपलब्ध असून घनकचरा व्यवस्थापनाची व्यवस्था करण्यात आलेली आहे.

विंचूरगवळी गावाचे मुख्य उत्पन्न शेतीवर आधारित आहे. द्राक्ष, टोमॅटो, भाजीपाला, कांदे, गहू, मका व सोयाबीन ही प्रमुख पिके आहेत. टोमॅटो (९० हेक्टर), भाजीपाला (१५० हेक्टर), कांदे (५० हेक्टर), गहू (५० हेक्टर), मका (८५ हेक्टर) व सोयाबीन (८७ हेक्टर) इतके पीकक्षेत्र आहे. फळबागायतीत डाळिंब (२५ हेक्टर) व द्राक्ष (१३७ हेक्टर) लागवड केली जाते. सिंचनासाठी ३०० विहिरी, ८५ बोअरवेल, २ शेततळे, १ ओढा व ७ बंधारे उपलब्ध आहेत.

धार्मिक व सांस्कृतिकदृष्ट्या गावात मारुती मंदिर व महादेव मंदिर असून उत्सव व परंपरा मोठ्या उत्साहात साजऱ्या केल्या जातात. समाज मंदिर, स्मशानभूमी (विंचूरगवळी व सुलतानपूर) या मूलभूत सुविधा गावात उपलब्ध आहेत.